المساعد الشخصي الرقمي

مشاهدة النسخة كاملة : مليونيرات ودالفضل


alnazeer
07-29-2011, 09:17 AM
اولا ارجو من الاخوة الاعضاء ان يمسكوا انفسهم قليلا لأحكي لكم عن تجربه شخصية عشتها امس بودالفضل حيث كنا نصلي الظهر بالمسجد العتيق وبعد الفراغ من الصلاة قام الاخ القمر عبد الكريم واستأذن من شيخ الطيب الفكي عبد الملك وبدأحديثه بأن هناك شركة صينية تريد ان تساعد اهل القرية وتوظفهم جميعا نساء ورجال اطفال وشيوخ بمختلف مهنهم مزارعين وحدادين واطباء ومعلمين وقد ذكر ان معه من الشركة مدرب عالمي مصري الجنسية يعمل في الشركة وقد حضر معه في المسجد وقد حدد الاخ القمر ساحة البئر القدامي مكانا للتنوير او المحاضرة التي سوف يوضح فيها المدرب طبيعة العمل بعد صلاة العصر فذهبا بعد صلاة العصر في الزمان والمكان المحدين ورصت الكراسي وحضر جمع من الناس وبدا شيخنا احمد عبد الغفار بالقرآن الكريم ثم تحدث المدرب المصري حيث ذكر ان هذه الشركة الصينيه لها اكثر من مأئه وتسعون فرع علي نطاق العالم وهناك كثير من الناس اصبحوا مليونيرات بسببها حيث ذكر ان هناك سيدة سودانية يبلغ راتبها الشهري 84 مليون وسبعمائة الف جنيه امسكوا الخشب شهريا وهناك بائع لبن من قرية ودابوصالح صرف راتبا بمبلغ سبعه مليون جنيه وقد اخرج صورة لشيكين احدهما بمبلغ 32 مليون وثلاثمائه واربعون جنيها وآخر بثمانيه وثلاثون مليون جنيه وقد قمت انا بقراءت الشيكين امام الجميع ثم بعد ذلك دخل في طبيعة عمل حيث ذكر بأن التسجيل في الشركة يتم بأن بدفع مبلغ 60 جنيه حيث يكتب لك عقد وتعطي علبة مثل علبة دبلة الخطوبه بداخلها شعار الشركة ثم تقوم بشراء اشياء من الشركة قيمتها 600 جنيه ومنتجاتها عبارة عن صابون ومعاجين للتخسيس وبعض المنتجات الطبيه وبعد تسجيلك و شراءك للمنتجات تقوم بعرض واقناع خمسه اعضاء اخرين ثم الخمسه كل واحد يأتي بخمسه وهكذا بشكل هرمي
ونواصل ابقوا معنا حتي النهايه

مسلم خلف الله التاي
07-29-2011, 09:34 AM
قبل ما تواصل ياحاج النذير دا إحتيال ليس إلا وخاصة بعد دخل فيها المصري دا ديل دايرين يلمو قروش ومع السلامة زي فكرة كيوتست تجيب خمسة والخمسة يجيبو خمسة وإنت ماشي يعني القمر حظو حيجيب الحلة كلها دا من أسع بقي مليونير ,,,
ما تنطلي عليكم الوهمة يا جماعة معاجين تخسيس نسوي بيها شنو؟؟؟
حزاري ثم حزاري
عقب بجيك صاد يالنزير

سفيان محمد عبدالله
07-29-2011, 09:37 AM
بسم الله الرحمن الرحيم
شكرا أخ النزير للتنوير
ولكن أضيف لك أن هذه الشركه عباره عن التجاره الإلكترونيه وأكثر رواد هذه الشركه من المناطق الطرفيه في الخرطوم وأفيدك أن بعض علماء الدين حرموا هذه التجاره لأنك سوف ترتفع بأسمك علي حساب الخمسه أشخاص الذين تأتي بهم وأنا بقول لك الكلام عن تجربه يوجد معنا واحد إشتغل معهم سنتين ولكن في النهايه لم يجني غير ضياع الزمن أرجو أن لا يبجرف الأهل وراء مصلحة الوكيل المصري لأنه هو المستفيد الأول بجلب العملاء

مسلم خلف الله التاي
07-29-2011, 09:41 AM
وحضر جمع من الناس وبدا شيخنا احمد عبد الغفار بالقرآن الكريم
الله يديك العافية يالنذير علي عكس ما يدور ,,,
نحن طيبين طيبة بطريقة عجيبة زول تاجر جاء يروج لتجارتو البايرة ويعملو ليهو قومة وقعدة ,,,
دا مفروض يقولوا ليهو شكراً ويتخارج علي طول

alnazeer
07-29-2011, 09:43 AM
نواصل ثم تعطي نسبة 20٪ من الخمسة الذين احضرتهم ونسبة 4٪ من كل خمسه احضروهم الخمسة الذين احضرتهم وعليهم نفس الشروط وهي رسم التسجيل وشراء منتجات بقيمة اجماليه 600 جنيه واثناء الحوار والشرح حضر شيخ الجيلي بخيت وطلب شرحا لهذه المعاملة ورأي الدين فيها وقمت بكتابة اسم الشركة وهي شركة تينز الصينية علي محرك البحث قوقل وانا جالس مع الحضور فجاء الرد من موقع المشكاه الاسلامي من فضيلة الشيخ عبدالحي يوسف بنفس السؤال وباسم الشركة نفسها وكان رد فضيلته بان هذا اكل لاموال الناس بالباطل حيث ان هناك متربحون وهم من في قمة الهرم ومتضررون وهم منفي اسفل الهرم وايضا اجتمعت بيعتان في بيعة وهي البيعة والاجارة وان المقصود ليس المنتج نفسه وانما الترويج لمال قد يأتي او لا يأتي فلايجوز التعامل بها وهي صيغة باطله 0
وبعد ان اطلعت شيخ الجيلي علي فتوي الشيخ عبدالحي خاطب الحاضرين ببطلان هذه المعامله وهي حرام شرعا ثم انفض الناس و كل كان يمني نفسه بأن يصبح مليونيرا

مسلم خلف الله التاي
07-29-2011, 09:49 AM
وبعد ان اطلعت شيخ الجيلي علي فتوي الشيخ عبدالحي خاطب الحاضرين ببطلان هذه المعامله وهي حرام شرعا ثم انفض الناس و كل كان يمني نفسه بأن يصبح مليونيرا
الحمدلله كدي ياداب ما رقنا وإتنفسنا أصلاً مفروض الزول دا ينطرد من البداية وما يدوهو فرصة للإعلان عن بضاعتو الفاسدة والبايرة وكمان الإفتتاح بالقرأن الكريم ياخي دي طيبة مبالغ فيها,,,

عبدالرحمن مختار
07-29-2011, 09:55 AM
الحمد لله انهم انفضو سالمين بدون اي اضرار دفع 0او جلب اناس مساكين تقع ضحايا في مثل هذا الدجل المغنن

فوتوكلر
07-29-2011, 11:07 AM
http://www.m5zny.com/upfiles/hdj30333.jpg (http://www.m5zny.com/)

مسلم خلف الله التاي
07-29-2011, 11:22 AM
http://www.m5zny.com/upfiles/hdj30333.jpg (http://www.m5zny.com/)
كمان جابت ليها شالات وجلاليب؟؟؟؟
إحتيال أكتر من دا؟؟؟

فوتوكلر
07-29-2011, 11:23 AM
http://www.m5zny.com/upfiles/bji30987.jpg (http://www.m5zny.com/)




المصري يشرح ومن خلال شرحه أكد للحضور أنه مرشح لنيل جائزه سياره فحمه كوريلا موديل 2011
تقدر بقيمة ‏72 مليون
براهو!!!!!!!!
قال :
زننننننننننننننننن
زن زن زن
ثم سرد كيف حصل قال الحين
في شبكتو ‏ أو السلسله الهرميه ما يقارب ال ‏956 شخص

alnazeer
07-29-2011, 11:23 AM
http://www.m5zny.com/upfiles/hdj30333.jpg (http://www.m5zny.com/)

في هذه الصورة يظهر المدرب العالمي المصري إدريس وبجانبه القمر عبدالكريم

فوتوكلر
07-29-2011, 11:35 AM
http://www.m5zny.com/upfiles/ynl31873.jpg (http://www.m5zny.com/)



حاج سعيد
كان حاضر عينه علي المصري
وقلبه يدق من المغربي
؛؛؛؛؛؛؛؛
؛؛؛؛؛؛
؛؛؛؛؛
؛؛؛؛
؛؛؛

عادل عثمان
07-29-2011, 12:10 PM
في هذه الصورة يظهر المدرب العالمي المصري إدريس وبجانبه القمر عبدالكريم

الحمد لله ياحاج النذير
انكشف قبل ما يلهط حق الناس ويهرب
والبركة في جية شيخ الجيلي الفضحوا قدام الناس ..
الزول البشبه الحضري دا أظنو قايل الناس مغفلين ..!!
الحضري لهط قروش الوالي ودا داير يلهط قروشنا ، والدنيا قبايل صيام وسكر وكبكبي وقمردين ..!!
الله يقطعو ويقطع يومو ..
أخونا القمر مسكين ، غشاهو الحلبي وصدق !!
قراية شيخنا فكي أحمد أوجعتني بالحيل وفي ميزان حسناتو إن شاء الله ..

ابو مهج
07-29-2011, 12:27 PM
الجدع ده البارح عمل محاضره في حي الرفاعيين بعد المغرب
في ديوان عبدالرحيم البشير
‏*‏
الترقيه بالنجوم
من النجمه الاولي لغاية النجمه التامنه
‏*‏
الجدع ده لازم تستلموا الشرطه
‏*‏
نفس موضوع القرص الحيوي
‏*‏
اول مره اسمع إنو في مصري إسمو إدريس

ابومسلم
07-29-2011, 12:46 PM
ا
اول مره اسمع إنو في مصري إسمو إدريس

ملاحظه مهمه شديد يا ابوها
هم قايليننا مقفلين
وهو زاتو تلقاهو احتار فى الناس الجادين ديل وقال خلاص لقيت لى منجم بتاع قروووش
لكن انشاء الله تعتر فيهو الشرطه عشان يورهو كيف
ولو كان فيها خير كان امش يشغل المصريين الجيعانين ديل
لكن حقو الناس تلبد ليهو ويدوهو بتنه كاربه عشان يكون عبره لمن عتبر
(الخوف يكون فى ناس سجلو)

فخرالدين الطيب
07-29-2011, 12:54 PM
واحددجال في الحصاحيصاشايل كميه من الحجبات طلع واحد من نص الكوم لعمنا مصطفي السيمت قال ليهو امسك هجاب البيع
رد السيمت ردااحترافيا بسيطا قال
خلي يبيع اخوانو
الزول ده بتحاوم مالو ما يغني روحو

ابو مهج
07-29-2011, 01:00 PM
في هذه الصورة يظهر المدرب العالمي المصري إدريس وبجانبه القمر عبدالكريم

هاهاهاهاها
البدري ولا إدريس
‏*‏
الجدع ده دكتور ولا مدرب ولا شيخ؟

ابوسحنون
07-29-2011, 01:54 PM
طبعا الموضوع دا احتيال واضح ولا داير ليه تفسير كتير وربنا كشف مكر المصري قبل ان يحتال المساكين . نسأل الله ان يوقع هذا الافاق في شر اعماله .

دقش
07-29-2011, 02:02 PM
تسلم اخي النذير وبصراحه انا اتفق مع كلام الاخ مسلم وبقيه الاعضاء
دا احتيال ونصب والبدور اساعد مابجي اكوس لقروش المساكين ديل
والحمد لله الذي كشف امره والشكر لكم انتم الذين فضحتم امره قدام
الناس وخلي امش اساعد كدي كدي نحنا بنقول لي مامحتاجين لمساعدتك
والله الغني عنها ان شاء الله بالله شوف المصري دا

عادل عثمان
07-30-2011, 08:28 AM
الجديد شنو في الموضوع دا ؟؟
المحتال طفش ! ولا لسه يتحاوم في شوارع الحلة ؟ :mad:

محجوب احمد طلحة
07-30-2011, 03:18 PM
الحمد لله ياحاج النذير
انكشف قبل ما يلهط حق الناس ويهرب
والبركة في جية شيخ الجيلي الفضحوا قدام الناس ..
الزول البشبه الحضري دا أظنو قايل الناس مغفلين ..!!
(الحضري لهط قروش الوالي ودا داير يلهط قروشنا ، والدنيا قبايل صيام وسكر وكبكبي وقمردين ..!!
الله يقطعو ويقطع يومو ..)
أخونا القمر مسكين ، غشاهو الحلبي وصدق !!
قراية شيخنا فكي أحمد أوجعتني بالحيل وفي ميزان حسناتو إن شاء الله ..

ها ها ها ها ها


وزي ما بعملو الجماعة بقول :


2 2 2 2 2 2 2 2 2 2 2 2 2
2 2 2 2 2 2 2 2 2 2 2 2 2
2 2 2 2 2 2 2 2 2 2 2 2 2

ابراهيم عبد اللطيف
07-30-2011, 03:32 PM
صباح اليوم في {الجزارة} مجموعة من المواطنين يتحدثون عن هذا الموضوع بحماس شديد ويقومون باجراء عمليات حسابية {يعني الحكاية وقعت ليهم}

محجوب احمد طلحة
07-30-2011, 03:38 PM
نواصل ثم تعطي نسبة 20٪ من الخمسة الذين احضرتهم ونسبة 4٪ من كل خمسه احضروهم الخمسة الذين احضرتهم وعليهم نفس الشروط وهي رسم التسجيل وشراء منتجات بقيمة اجماليه 600 جنيه واثناء الحوار والشرح حضر شيخ الجيلي بخيت وطلب شرحا لهذه المعاملة ورأي الدين فيها وقمت بكتابة اسم الشركة وهي شركة تينز الصينية علي محرك البحث قوقل وانا جالس مع الحضور فجاء الرد من موقع المشكاه الاسلامي من فضيلة الشيخ عبدالحي يوسف بنفس السؤال وباسم الشركة نفسها وكان رد فضيلته بان هذا اكل لاموال الناس بالباطل حيث ان هناك متربحون وهم من في قمة الهرم ومتضررون وهم منفي اسفل الهرم وايضا اجتمعت بيعتان في بيعة وهي البيعة والاجارة وان المقصود ليس المنتج نفسه وانما الترويج لمال قد يأتي او لا يأتي فلايجوز التعامل بها وهي صيغة باطله 0
وبعد ان اطلعت شيخ الجيلي علي فتوي الشيخ عبدالحي خاطب الحاضرين ببطلان هذه المعامله وهي حرام شرعا ثم انفض الناس و كل كان يمني نفسه بأن يصبح مليونيرا

الحمد لله الذي فضح هذا الحلبي المحتال علي روس الاشهاد

والف شكر للاخ النزير الذي استفاد من التكنلوجيا في الوصول الي الفتوي

وكان زكياً بان اوصلها الي الناس بواسطة شيخ الجيلي

حتي تصل للناس من لسان داعية , ويصرفوا النظر عن هذا الدجال


( والله طيبة شديدة )

abayazeed
07-30-2011, 04:23 PM
الزول ده خلا ليهو 70 مليون مصري وجاء يكوس ليها عندنا
تلقاها عند الغافل يا حبيبي

عادل عثمان
07-30-2011, 04:27 PM
الإخوة مولاناتنا (أبايزيد ومحجوب) ..
ماهي عقوبة مثل هذا المحتال ، إذا تقدم أحدهم ببلاغ إحتيال ضده ؟؟

abayazeed
07-30-2011, 04:44 PM
الإخوة مولاناتنا (أبايزيد ومحجوب) ..
ماهي عقوبة مثل هذا المحتال ، إذا تقدم أحدهم ببلاغ إحتيال ضده ؟؟


اليكم تعريف جريمة الاحتيال وفقا للقانون الجنائي السوداني لسنة 1991
الاحتيال.
178ـ (1) يعد مرتكباً جريمة الاحتيال من يتوصل بسوء قصد إلي خداع شخص بأي وجه ويحقق بذلك كسباً غير مشروع لنفسه أو لغيره أو يسبب بذلك للشخص أو لغيره ضرراً أو خسارة غير مشروعة.
(2) من يرتكب جريمة الاحتيال يعاقب بالسجن مدة لا تجاوز ثلاث سنوات أو بالغرامة أو بالعقوبتين معاً.
(3) من يرتكب للمرة الثالثة جريمة الاحتيال يعاقب بالسجن مدة لا تجاوز خمس سنوات كما تجوز معاقبته بالغرامة.
وقد عرفت الماده 3 من القانون سوء القصد
" سوء قصد " يقال عن الشخص انه فعل شيئاً "بسوء قصد " إذا فعله بقصد الحصول على كسب غير مشروع لنفسه أو لغيره، أو بقصد تسبيب خسارة غير مشروعة لشخص آخر،
وتعنى عبارة " كسب غير مشروع " الحصول على مال أوحجزه بطريق غير مشروع، وتعنى عبارة "خسارة غير مشروعة" حرمان أي شخص من ماله أو منعه منه أو حجزه منه بطريق غير مشروع،

afrahahmed
07-30-2011, 04:58 PM
عارفين ده زى نظام الشركة القبل كده انا كلمت عنها ابو مهج
اسمها كوتش نت
منتجاتها بى 2 مليون (القرص الحيوى او ساعة او اكسسوار ) الواحد من دول بى 2 مليون جنيه
وتشترك
وكل ما تشرك زول تحتك تجيك قروش زيادة
والناس البتشركهم بشركو ناس تحتهم وانت برضو ليك نسبة
وكلام كتيييييييييييير
وعندهم محاضرات
اوعكم تتغشوا ليهم
لانو الربح بطريقة غير شرعية
والموضوع ده انتشر كتير فى الايام الاخيرة دى
وربنا يثبت قلوب الناس على الرزق الحلال انشاء الله

ابراهيم عبد اللطيف
07-30-2011, 05:01 PM
عادل وابايذيد يجب ان لا ننسي ان هذه الشركة مسجلة وبالقانون وكما يقال {القانون لايحمي المغفلين}

عادل عثمان
07-30-2011, 05:16 PM
شكرا مولانا علي شرح النص القانوني الخاص بالاحتيال ..
يعني ما فيها جلد !!!
زي دا بستحق 100 جلده قبل ما القاضي ينظر في أمرو

سلمي خليفه
07-30-2011, 06:30 PM
وربنا يسلم لسه من المجرمين والدجالين

مشكور ابوريان علي التغطيه
ومولانا علي الشرح الوافي


جزيتم الجنه .

ابو مهج
07-30-2011, 07:42 PM
وربنا يسلم لسه من المجرمين والدجالين

مشكور ابوريان علي التغطيه
ومولانا علي الشرح الوافي


جزيتم الجنه .

سألتك في الراكوبه ان تحكي قصة النجمه التامنه
لآنو كان في فريقكم
لسه ماعرفنا إذا كان في زول سجل

abayazeed
07-30-2011, 07:58 PM
سألتك في الراكوبه ان تحكي قصة النجمه التامنه
لآنو كان في فريقكم
لسه ماعرفنا إذا كان في زول سجل


ام سولار احي قصة النجمه التامنه
ولا خلي ابومهج يحكيها

عبدالله عبدالرحمن
07-31-2011, 09:54 AM
الاخوه والاخوات مشكورين علي هذا التوضيح ورمضان كريم وربنا احفظ البلد من امثال هاؤلا

عباس حمد
08-17-2011, 05:54 PM
حقيقة والله موضوع مهم جداً تناوله و تسليط الضوء عليه حتى لا يقع الناس البسطاء ضحايا لمثل هؤلاء المحتالين الذين يأكلون أموال الناس بالباطل و يعيثون فى الارض خراباً بافكارهم التى تهدم الاقتصاد و تهدم القيم السلوكية بالنسبة للمتعاملين معها لأن الشخص عندما ينتسب اليهم و يدعو الناس للدخول لكى يكسب من الزيادة الهرمية يكون بذلك قد تعرى من القيم الانسانية لانه يعلم تمام العلم بان هذا الوضع غير صحيح و مرفوض و هذا المال ليس من حقه و يعلم الكثير و الكثير مع ذلك هو يتمادى فى عمله الغير شرعى و ياكل الحرام و العياذ بالله .. و يغش الناس البسطاء ...


اللهم اغنينا بحلالك يا رب العالمين

رمضان كريم يا [you]

ودالنوراني
08-17-2011, 06:06 PM
الله أكرم إديك العافية ياعباس ومزيدا من المشاركات

عباس حمد
08-26-2011, 05:24 AM
الله أكرم إديك العافية ياعباس ومزيدا من المشاركات
تسلم يا ود النورانى
و اذا كان على المشاركات اطمئن كتاااااب و برااااى برى شديد الا تزهجوا منى ... :rolleyes: